【中學：比我知道你拍拖就死；大個左：你男/女朋友喺邊呀】
喂新年快樂呀！我咁耐冇出文係咪以為我死左呢，係呀真係就死，係忙死，不過忙係一件好事黎既(好似係)。咁今日我想講下新年見到親戚既感受，我諗你地都好有共鳴。
其實我地老竇老母都幾奇怪，就係返學嗰陣唔比你拍拖，話讀完曬書先可以拍。但以前邊有咁聽話吖，寧願偷偷地拍唔比屋企人知，都要試下初戀既感覺。試過講大話話自己出去做專題研習，又試過見到熟人即刻放開原本捉緊既手，咁辛苦偷偷摸摸都係想享受兩個人一齊既小小小小......時光。可惜好景不常，紙係包唔住火既，加上你知啲老師最X中意拆散鴛鴦！經過一輪角力都係避免唔到比人cut電話同禁足既命運。
不過當然有啲人好乖唔會搞地下情，真心聽兩老講保持單身狗姿態..一單身，就單身左十幾廿年，完全地展現A0既偉大情操。
好囉咁依家真係乜野男女朋友都走曬，老竇老母應該最開心啦！...又唔係喎。返工你以為可以逃過佢地既緊箍咒？點知每日放工就問：「呀仔，你幾時帶女朋友返黎食飯呀。」咦？sorry，我係咪聽錯左啲野？女朋友？嘩哈哈哈，真係「龍門任你擺」呀，好野吖！所以有時真係唔想返屋企，就係佢地令我地喺愛情路上面一直失敗。
直到新年當你表妹表弟都帶埋男女朋友返黎，而你自己一個去拜年嗰陣，認真係一個悲劇。暗示、明示、寸、窒、鬧，總之目的係令你呢隻單身狗趴喺度「嗚嗚」聲咁慘叫。我諗依家最受歡迎既職位已經唔係醫生、律師，而係魔法師——隨時隨地變另一半出黎。
Search